.

اللَّهُمَّ إِنَّكَ عَفُوٌّ كَرِيمٌ تُحِبُّ الْعَفْوَ فَاعْفُ عَنِّي

أوعــــى الفيبريشن

الأربعاء، 7 أكتوبر 2009

الخنزير هو الحل ! ! !

إنه الحل لكل مشكلات العصر ..ومش العصر بس .. دا العصر والمغرب والعشاء.... وايجاد لكل الفرص الضائعة .. والغائبة ... واللى ناوية تتضيغ وتغيب ... انه الحل لجميع المشكلات والمعوقات .. هو الحل السحرى ...هو مرض انفلونزا الخنازير .... الخنزير هو الحل.
وفيما يلى رصد لكل المشكلات التى يعانى منها المجتمع ... ولكن للاسف ... لم يستطع المجتمع اللى بيعانى من حل تلك المشكلات اللى بيعانى منها... وعلى ما اظن ان المشكلات هى اللى بقت تعانى من المجتمع ... وقد جاء الخنزير لكى يقدم الحلول على طبق ... طبق فاضى…... ويريح المشكلات اللى محدش عارف يحلها.

المشكلة السكانية
عشان نحل مشكلة الكثافة السكانية اللى بقالنا كتير قوى مش عارفين نحلها ... دلوقتى انفلونزا الخنازير جت عشان تحل الموضوع... عشان طبعا الخنازير .. لو انتشرت ... ممكن تاخد فى وشها كدا ... يعنى 10 مليون .. يعنى مثلا لو مات 10 مليون ولا 5 مليون .. يبقى كدا قضينا على الكثافة السكانية .. وطبعا ربنا يرحم اللى هيموت ... بس فى ناس كتير ماتوا... ولازم ناس تموت ... عشان ناس تعيش ... احسن ما من ما نعرفش نعيش كلنا ...ولا ايه .. ويا خنزير يا معيشنا .

مشكلة النظافة

*كانوا زمان جايبين مدام نظيفة ... ال ايه عشان نبقى نضاف .... دلوقتى جه الخنزير ... عشان نبقى نضاف " مع ان الخنزير دا معفن " كان لازم يجى مرض زى دا عشان يخلى كل حاجة نضيفة ... ونبقى مجبريين ان احنا نبقى نضاف احسن يجلنا المرض ونموت ... هنيجى على نفسنا شوية ونبقى نضاف ...... ويا خنزير يا منضفنا.

مشكلة المواصلات

طبعا مش هيبقى فى مشكلة مرورية... وهنلاقى الشوارع فاضية ..... والمترو فاضى .... وكل حاجة فاضية والدنيا رايقة ... ولا تقولى ماتش ... ولا تقولى ساعة الفطار فى رمضان... مش هتلاقى حد خلاص
عشان تلاقى الناس خايفة تتعدى ... هتقولك افضل فى بيتى احسن ... ويبقى طبعا البركة فى الخنزير .... الخنزير دا بجد حاجة محصلتش.

مشكلة التعليم

كان قبل ما يجى الخنزير الفصل فيه حوالى 70 او 80 وكمان بيحضروا كل يوم.... انما بعد الخنازير ... المفروض هيروحوا 3 ايام ... والعدد هيبقى النص يعنى مثلا 30 او 40 يعنى العيال هتفرح ... وهتفهم ... يعنى مفيش احسن كدا .... يعنى الخنزير مش عارف يعمل ايه اكتر من كدا.

وجارى البحث عن مشكلات .... عشان الخنزير يحلها ... وسمعنى اغنية
خنزيرى الجنينه.