.

اللَّهُمَّ إِنَّكَ عَفُوٌّ كَرِيمٌ تُحِبُّ الْعَفْوَ فَاعْفُ عَنِّي

أوعــــى الفيبريشن

الخميس، 21 أكتوبر، 2010

حفاظة الوطن




البلاد اشبه بالاطفال والشعوب اشبه الحفاظات وليس المحافظات ويا ريت تفهمنى غلط لانى اقصد حفاظات الاطفال ... اللى هى سبع طبقات وأستك يعنى ممكن نلاقى شعب 5 طبقات واستك... وشعب تانى 6 طبقات ومن غير استك ... وشعب مش بيستخدم الحفاظات وبيستخدم الكوافيل وشعب مش بيستخدم اى حاجة من الحاجات دى كلها وبيسيب البلد بتاعتهم على البحرى واللى ما يشترى يتفرج..


ولكن فى حالة الشعب بتاعنا فاحنا بنستخدم حفاظات بس مش من ام سبعة طبقات واستك
احنا الحفاظة بتاعتنا 3طبقات ومن غير استك !

وبعد صراع مرير مع ال 3 طبقات ادى الى تآكل الطبقة الوسطى و معدش ليها اى اثر وبقيت الحفاظة طبقتين وبس وبرضوا من غير استك..


وطبعا الطبقة اللى الوسطى اللى هى كانت فى النص تأكلت عشان كانت عاملة مشاكل كتير ادت الى حدوث بلبلة فى المناطق الحساسة لدى الدولة فى حين ان الدولة مش بتستحمل التسلخات وطبعا احنا ميرضيناش ان حفاظة البلد يبقى فيها اى بلبلة ولا اى حاجة من الحاجات دى
ودلوقتى بقينا حفاظة بطبقتين ومن غير استك والطبقتين فى واحدة فيهم قدام والطبقة التانية هتبقى عكس اللى قدام!


فتخيل كم ستتحمل الطبقة اللى مش قدام كل الضغوط و الحاجات و المحتاجات اللى ممكن تحصل ومن الممكن انها تتعرض للبلبلة والتآكل زى الطبقة الوسطى وميبقاش فى الا الطبقة اللى قدام اللى هى طبعا مرتاحة اخرحاجة واول حاجة واى حاجة ما بينهم..


وبكده ممكن نكون طبقة واحدة من غير استك بس هو احنا ليه من غير استك...يعنى لو لقدر الله جه يوم ووقفنا على رجلنا لقدر الله تخيلوا شكل الوطن وهو واقف و بحفاظة ومن غير استك يمكن عشان كده احنا مش عاوزين البلد دى تقف على رجلها لانها لو وقفت على رجلها الحفاظة هتوقع وكل حاجة هتبقى على عينك يا تاجر!!!

الجمعة، 23 يوليو، 2010

عزيزى المستهلك ... اشحنى !


عزيزى المستهلك احب اصبح على حضرتك لو كنت لسه صاحى وامسى على حضرتك لو كنت لسه نايم ولو بقى مبسوط لازم انبساط حضرتك يجيله هبوط حيث ان السبب بسيط ولا يوجد فى الامر اى شىء عجيب فقد تحول عزيزى المستهلك كل شىء يستهلك الى كروت شحن واعلم عزيزى المستهلك ان لا تعلم الا ان كروت الشحن تستخدمها لكى تشحن الموبايل الخاص بسيادتكم ولكن الان الامر اصبح عند حضرتك كذا اوبشن للشحن
فقد دخلت كلا من المياه والكهربا حقبة جديدة بحمالة على الشمال وتم دخولهما عمليو الشحن ويجب عزيزى المستهلك ان تقوم بتغيير عداد الكهربا اللى العداد اللى بيشحن وان تقوم بشحنه على قد فلوس حضرتك ولنفرض مثلا ب 10 جنيهات مع العلم ان عندما يوشك رصيدكم على النفاذ هتلاقى سيادتك اللمبة الحمرا ولعت ... ولعت ع الاخر فيجب عليك عزيزى المستهلك ان تقوم بشحن كارت اخر قبل ان ينفذ رصيدكم وحينها سوف تعيش فى ظلام دامس اما بخصوص المياه فيجب عليك عزيزى المستهلك ان تقوم بتركيب العداد الاخر الخاص بالمياه حتى تقوم بشحن المياه الخاصة بسيادتكم ومع حدوث مشكلة حوض النيل وتوقع قلة حصة مصر من مياه النيل فانه يجب عليك عزيزى المستهلك ان تقنن من استهلاك المياه وعدم الحموم عدا مرتين فى العام " العيد الصغير والعيد الكبير" وان تقوم بشحن كارت شحن حتى تستطيع ان تشترك فى خدمة المياه مع العلم انه سوف تكون المياه شغالة 20 يوم صلاحية ويوجد 10 ايام فترة سماح لايسمح من خلالها الا ان حضرتك تشحن كروت شحن حتى تستطيع ان تلغى فترة السماح وتتدخل فى فترة الصلاحية ويتوقع الخبراء انه بعد نجاح تطبيق كروت الشحن فى الكهرباء والمياه سيتم تطبيقها فى محطات البنزين واشتراكات الانترنت والتموين وسوف يتم صرف المرتبات للموظفين كروت شحن حيث يسهل على المستهلك الحصول عليها واذا ارد الحصول على فلوس فانه يقوم بتحويل الملبغ المراد مع خصم 6 قروش لو شبكتك كانت حمراء و 4 قروش لو كانت شبكتك صفراء وقرش واحد لو كانت شبكتك خضرا وسوف تقام عروض ومسابقات عزيزى المستهلك حتى نعاونك على تحمل اعباء الحياة ... تلك الحياة التى اصحبت شبكتها بتقطع وخطها موقوف من الخدمة ورصيدها اللى قال عفوا ... فلتعلم عزيزى المستهلك ان ما نقوم به هو ما يخدمك ويخدم مصلحتك اولا ولا يهمنا عزيزى المستهلك الا راحتك ثم راحتك ثم راحتك عزيزى المستهلك انا مضطر اسيب حضرتك دلوقتى لو كنت صاحى ادخل نام ولو كنت نايم بلاش تصحى ملحوظة : هذا المقال يخضع لسياسة الاستخدام العادل حيث ان عدد الحروف والكلمات مطابقة للمواصفات ومعاها شهادة ايزوووه

السبت، 27 مارس، 2010

نظرية قلة الادب !!!




طبقا لنظرية الممنوع مرغوب… وسيب اللى فى ايدك وبص للى مش فى ايدك .. ومليش دعوة انا عاوز من ده....... فانى اتقدم باقتراح بانشاء وزارة جديدة تحمل اسم " وزارة بلا تربية بلا تعليم
"
طبعا الكلام دا انا جبته من الرف الشمال اللى موجود فى الركن اليمين ودا كان فى النصف الكروى اللى فى دماغى
فى الوقت الحالى من الالفية اللى جايه علينا تلاقى اول ما تتدخل برجلك الشمال العالم بقت غريبة قوى ناس تقولك انا عاوز ولادى متربيين احسن تريبة.. واعلمهم احسن تعليم ( علامة تعجب ) مع انى فى الحقيقة مكنش فى لا تريبة ولا تعليم ..طيب ليه بنضحك على بعضنا… ما تيجى على طول واجيلك على عرض ونجيب حد يجيب لينا الارتفاع ونبقى كدا حددنا الحل هو ان احنا ندرس قلة الادب ونخلى طريق الفشل ممهد للجيل الصاعد لدور النهائى من الدنيا ديا ونخليه ياخد فرصته ممكن يجيب لينا كأس ويشيل عننا الفأس ونعمل كلنا جلابية بارتى عند شلابية جارتى.
يعنى مثلا اولياء الامور يقعدوا سنين عشان يعلموا اولادهم معنى التربية ( ناس غريبة ) وسنين كمان عشان يتعلموا فى المدرسة و الجامعة ( لا بجد ناس غريبة قوى بقى ) وطالما دا بقى فى ايديهم يبصوا بقى على اللى مش فى ايديهم ما هو البنى ادم فى الاصل طماع.. وطالما بقى معاهم الادب والعلم يبقى لازم تبقى عينهم بقى على قلة الادب والجهل
لو حاولنا بقى نقلب الكلام ونخلى قلة الادب وقلة التعليم وقله كل حاجة متاحة ... والادب والتعليم والتربية ...والحاجات الوحشة دى هى اللى مش متاحة يا ترى الناس هيبقى نفسها تكون متربية ومتعلمة ولا يا ترى هيكون نفسهم فى حاجة تالتة احنا منعرفش عنها حاجة.
بس يمكن ساعتها هنلاقى الاولاد قريبين من اهلهم ..مش هيخبوا عليهم حاجة هيخبوا ايه بقى... دا هيبقى البساط احمدى
ويمكن اولياء الامور يتعلموا قلة الادب عشان ولادهم ميتعلموش قلة الادب من حتة غريبة
مع ان الناس المحترمين اهلهم مكنوش بيعلموهم قلة الادب .. كانوا بيسيبوا ولادهم يتعلموا قلة الادب من بره ..( ينفع الكلام دا ينفع يعنى)
بس احنا لازم ... لازم بجد نحمى قلة التربية ونحمى قلة التعليم من الناس المحترمين ونعطى كل ذى حقا حقه ..

بس اكيد ساعتها هنكون بنعمل حاجة احنا عارفين ايه هى حتى لو كانت غلط ومش هنضحك على نفسنا بحاجات مش موجودة.
. ولما يبقى كلا من التربية والتعليم من الممنوعات حينها سنشعر بالرغبة لهما و حينها يصبح التربية والتعليم فى الطريق السليم