.

اللَّهُمَّ إِنَّكَ عَفُوٌّ كَرِيمٌ تُحِبُّ الْعَفْوَ فَاعْفُ عَنِّي

أوعــــى الفيبريشن

الثلاثاء، 13 سبتمبر، 2011

ثورة على الغباء



يحكى انه فى زمان غير الزمان ومكان غير المكان كان يوجد بلاد كانت تُحكم بالنظام الملكى الا ان جاء بعض الشباب" وكان ليهم متحدث باسمه " وقالوا نعمل ثورة ونتستغل فيها غباء الملك وفعلا نجحوا فى استغلال غباء الملك ورغم قلتهم جمعوا الكثير من الشعب حولهم وحولوا بلدتهم من الملكية الى الجمهورية ... ولكنها كانت جمهورية زائفة هو تم ازالة الملكية ووضع الجمهورية " غيرنا التيتل يا عم الحاج " وحكم الجمهورية ملكها الاول "أعنى رئيسها الاول " ولكنه استطاع ان يقنع الشعب انه مختار رغما انه لم يختاره الشعب ولكنه كان ذكى فى مواقفة ثم قام وعين نائباً وبعدها توفاه الله ... تم اتى بعده النائب الذى صار على نفس خطاه تقربياً ولكنه كان اذكى منه حيث انه كان يستطيع ان يجعل من امامه يعتقد انه غبى ويفجاة بالعكس ... ثم قم بتعيين نائب له ... ثم تم اغتياله وتملك مقاليد الحكم النائب .
ولنتفترض جدلا انه كان الاذكى " او العكس" حيث انه فكر بالطريقة التى قد تمد فى عمره وفى حكمه ما قد يمد فى عمره عدم وجود نائب وما يمد فى حكمه عدم وجود شعب او وجود شعب زى قلته فاخذ براى حاشيته وشاورهم فى امره .. فنصحوه اناذاك بان يهتم بالغباء وكيف يحول الذكاء الى غباء وبالفعل نجح فى ذلك وظل على ذلك الامر لمدة 30 عاماً وظل الشعب حينها " غبى منه فيه " اللى ان فاق بما به " وممكن ميكونش فاق وتكون سهوة " وقام بانتفاضة " ثورة ملهاش صاحب " قلبت الحكم واصبح بلا جمهورية وبلا ملكية اصبح " دولة ملوخية " ولكن المشكلة مازلت قائمة فى الشعب ذاته هل تخلص من الحقن الذى اصابه ام انه مازال يسيطر عليه فاصبحت ثورة الشعب ارد الشعب كله ان يحكم نفسه كله " وكله على كله ولما تشوفه قوله " وكانت ثورة الشعب على الرئيس ومن يديرون النظام وليس النظام نفسه ... من كان يملكه من الممكن انه كان افسد منه ولكن النظام فاسد ..
الى ان افترح البعض ارجاع الملكية فرفض الشعب ... طب الملكية فرفض الشعب ... وارد الشعب ان يُحكم بطريقة التفصيل الذى لم يكن متوفر بالاسواق الى ان تم انقسام الشعب الى شعوب ثم الى افراد ثم .... وظلوا هكذا هكذا الى ان اصبح كل فرداً منهم رئيس لجمهورية نفسه وملك على مملكته وظل السؤال من كان الغبى حينها .

الثلاثاء، 21 يونيو، 2011

ثلاث نساء

السيدة الاولى تبلغ من العمر ما يقرب من 2000 عام ...انها ترتدى ثوب مهلهل لجسد لا يقوى ع الوقوف ... ونحافه وتجاعيد تكاد ان تصعق من صمود تلك المرأة على هذه المصاعب والمتاعب والالام الحياة ... ها هى ترتدى جلباب اسود لا ترتدى غيره ولكن مازال فيها الكثير من الخير والكثير من الامل ولكن اولادها لم يعدوا يقدرون قيمتها فاصحبت كاهلة عجوز تساقط اشعار الجمال الذى كان يشعرنا بها اصبحت فقيرة لا تملك من القماش سوى ما تدارى ها سؤاتها اصحبت مريضة وقد تنشىء المرض فى كل اجزاء جسدها ولكنها مع كل هذا لم يزل عندها الامل ان تصبح كما كانت بل واجمل مما كانت لانها تستحق ولكن الوباء و الفشل والياس يقفون فى طريقها دون الحصول على ذلك وعندما انظر اليها وهى ترتدى ذلك الجلباب الطويل الذى ينسدل على الارض وتلك الطرحة التى يكسوها الالم .

السيدة الثانية تبلغ من العمر ما يقرب من 200 سنة تبدو فى عز مجدها وفى شمس رونقها انها الشابة التى تستطيع التحكم فى كل شىء وفى اى شىء ولكنها امراة عاهرة ... انها ترتدى البنطال الضيق القصير ومن فوق شىء لا يذكر ... انها لا يغلب عليها شىء اذا ارادت ان تفعل شىء باى شخص فانها تقوم بذلك دون تردد ودون خوف انا حاكمة الامور واصحابها ابنائها ليسوا ابناءها فهم خليط من جنسيات واناس مختلفين .

السيدة الثالثة : تبلغ من العمر ما يقرب من 50 عاماً وهى بنت الحرام التى قد من الممكن اعتبار السيدة الثانية ام ثانية لها .. اى نعم هى لما تلدها ولكن كانت اشبه بالداية التى تقوم بحمل الرضيع وتقويته ... انها ترتدى الشورت وفوقه الكات وتفتعل اى شىء لاى شخص لانها تعلم ان هناك من يحميها ولن يستطيع فعل اى شىء بها فمنذ قدومها على وهى تخلق المشكلات .

فقد حاولت السيدة بنت الحرام ان تنشب اضافرها فى السيدة ذات 2000 عام وارادت ان تنزعها ملابسها وعرضها وعندما حاولت السيدة الدفاع عن نفسها فتتدخلت السيدة العاهرة ونجحا فى شل حركة ولكن سرعان ما قامت السيدة ونجحت فى استعاده قوامها المنحنى ولكن وضعت السيدة العاهرة شروطاً وقد قبلتها السيدة المسنة وبنت الحرام

ولنتخيل معاً سيدة تبلغ من العمر 2000 عام تصارع سيدة تبلغ 50 عام كم كنت اتمنى انا ان تقضى عليها ولا تجعل لها اثرأ فى هذا الدنيا وان تتحسر عليها عاهرتها ولكن هيهات ....

ولكن.....

وها هى السيدة الاولى ...قد قامت بخلع ما بها ما غبار لتنظر الى جسدها العارى الممزق ومع ذلك ما زال بنظر البعض اليها على انها فتنة ويرغب باغتصابها فهل من الممكن ان تعود اللى سابق عصرها بشبابها وسترتها ام انها ستظل هكذا عارية الى ان ياتى من يغتصبها من جديد كما فعل الكثيرون من قبل .


الثلاثاء، 19 أبريل، 2011

وما الدنيا إلا بيضة كبيرة


لما بصبت ل كتاب من كتب العلوم لاقيت المجموعة الشمسية وملاقتش المجموعة القمرية ولاقيت فى المجموعة الشمسية كوكبنا اللى خلانا فى الأرض وليس الأرض فحسب بل اسفل اسفل الارض... وملاقتش اى كوكب تانى اسمه السماء يعنى لو انت فى الارض وعاوز ترح السماء لازم تتدور بقى فى مجموعة تانية او ممكن تتشطر كدا وتعيد الثانوية وتتدخل مجموعة تانية غير المجموعة اللى فيها الارض

وبنظرة الى كوكب الارض نرى انه كوكب ليس بدائرى .. انما كوكب بيضاوى اشبه بالبيضة اللى بتبيضها الفرخة ولكن الفرق بين الكوكب البيضة وبيضة الفرخة ان احنا لسه مفقسناش عشان بيضة الفرخة بتفقس بعد 12 يوم انما احنا عايشين فى بيضة ممششة مهمشة

ونحن مع الاسف اشبه بالكتاكيت ولكن قد لا يعلم الكتكوت انه داخل بيضة ولهذا يخرج منها

ولكن نحن نعلم اننا داخل بيضة ولكن هل سنظل داخل تلك البيضة ؟

وعند الشباب هناك كلمة تدعى " بيض " وقد يعتقد البعض ان قد تكون كلمة شوارعية او كلمة مش متربية

بل على العكس

ارى انها كلمة معبرة جدا حيث ان اللفظ يعبر عن الكتكوت الذى يتاخر فى الفقس يصبح كتكوت بيض وهكذا الشاب الذى يظل يماطل ويماطل ويماطل ويظل هكذا ولا ينجز اى شىء ويظل يمشش ويبيض بيض ممشش على اصدقائه ويظل شاب بيض بيض بيض

ولكن ليس ذنب الشاب ان يكون شاب بيض فنحن فينا من الارض من حديد وبوتاسيوم وفسفور وجميع العناصر التى تواجد فى الارض وتوجد فى اجسادنا

وفلا نتعجب عندما نرى شاب يكون شاب بيض

وحكومة تكون بيض ونظل هكذا نقوم بعملية البيض يوميا

وقد اعتقد كل الاعتقاد ان الانسان سوف يتحول من الكائنات اللى تلد .. إلى الكائنات التى تبيض

ولاد عم مصرى ! احفاد عم عربى ....





ولاد عم مصرى ! احفاد عم عربى ....

يحكى ان ... كان فى راجل اسمه عم عربى وراجل تانى اسمه عم عبرى.. خلف عم عربى 22 ولد وخلف عم عبرى ولد واحد بس

كان ولاد عم عربى دايما الناس طمعانة فيهم ودايما الناس كانت بتطلع عينيهم مع انهم معملوش حاجة وكان كل همهم انهم يعيشوا فى سلام

وهما كانوا غير اى اخوات كان بيحبوا بعضوا وبيخافوا على بعض وبيعملوا حساب لبعض و كان اخوهم المصرى دا بيخاف عليهم دايما من اى حاجة

وفى يوم من الايام قرر ابن عمهم الاسرائيلى انه عاوز يعيش وسط ولاد عمه بغض النظر سواء ولاد عمه موافقين ولا لا .

راح جاب اتنين من صحابه البريطانى والامريكى وقالهم شوفولى مكان وسط ولاد عمى... والاتنين مكدبوش خبر وراحوا فضلوا يشوفوا انسب مكان ليه ولاقوه وكان عند ابن عمه الفلسطينى

وطبعا الفلسطينى قال الحقونى ..كل اخواته جهزوا نفسهم عشان يضربوا بن عمهم الاسرائيلى بس الاسرائيلى مكنش لوحده كان معاه اصحابه البريطانى والامريكى

وانضرب ولاد عم عربى وبقى يا عينى الفلسطينى مش عارف يروح فين ويجى منين

وبعد فترة حس الاسرائيلى ان مكان الفلسطينى مش كفاية راح داخل فى خناقة مع الاردنى والسورى واللبنانى والمصرى وخد من كل واحد حتة من ارضه غصب عنه

من هنا بقى ولاد عم عربى مش حاسين ببعض وكل واحد همه مشكلته

لحد ما فى يوم قرر المصرى انه ياخد حقه وراح ضرب الاسرائيلى وكان كل ولاد عم عربى واقفين مع المصرى ولما شاف البريطانى والامريكى ان المصرى مش سهل كدا قالوا نتقى شره نعمل معاه صلح ونديله ارضه وممكن يبقى تبعنا وما محبة الا بعد عداوة

وفعلا تم الصلح بين المصرى والاسرائيلى وخد المصرى ارضه وكان عاوز يرجع حق اخواته وبالذات الفلسطينى بس من غير خناق لكن اخواته حسوا ان اخوهم المصرى باعهم وكان همه مصلحته وبس وبدل مايبقى انا واخويا على بن عمى ... بقى انا وابن عمى على اخواتى...

وبقى المصرى مش عارف يعمل ايه... اخواته زعلوا منه وهو عاوز يجيب لهم حقهم بس من غير خناق ... ومبقاش عارف يروح يجيب حق اخواته ازاى وهما زعلانين كدا.. بس هو عمال يحاول ويحاول

ومرت سنين واتصالح المصرى مع اخواته مع ان اخواته لسه مخدوش حقهم ومش عارفين هياخدوه امتى وازاى؟

ومرت سنين وسنين واللى كان ما بين ولاد عم عربى وابن عم عبرى من بقى موجود مابين احفاد عم عربى ضد اولاد عم مصرى ومبقاش من تحت لتحت .. دا بقيت كل حاجة ظاهرة وبقى ولاد عم مصرى بيموتوا ... ويجى اخوات عم مصرى يقولوا لعم مصرى متزعلش اولاد وبتلعب مع بعضها

بقى اولاد عم مصرى عمالين يموتوا وعم مصرى ساكت ...

الجزائرين يموتوا فى ولاد عم مصرى عشان ماتش كورة ... وعم مصرى ساكت

والخليجيين بيكرهوا عم مصرى وبيحقدوا عليه .... وعم مصرى ساكت

والفلسطينين بيضربوا ولاد عم مصرى بالنار اللى بيدافع عنهم وبيحاول يجيب حقهم .. وعم مصرى ساكت

واللبنانين يقتلوا ويعلقوا ابن عم مصرى ويمثلوا بحثته ... وعم مصرى ساكت

بقى ولاد عم مصرى ملطشة .. للى رايح وللى جاى ويا ريتهم غرب دول قرب

ولادك يا عم مصرى بيموتوا واحد وراء التانى ... ولادك بقى رخاص وملهمش تمن...يا عم مصرى خاف على ولادك عشان ولادك تخاف عليك... ولو ولادك مش غاليين يا عم مصرى ....

تبقى انت مش غالى يا عم مصرى .........

تبقى انت مش غالى ياعم مصرى ....

تبقى انت مش غالى يا عم مصرى...

كان الرئيس إيها الشعب !


إنها الحصة الاولى و عندها دخل مدرس االلغة العربية الى الفصل و اذا به يصيح فى تلاميذه ويقول

عندكوا امتحان نحو النهارده على السبورة واللى مش هيعرف يحل ليلته هتبقى مطينة بطين

واذا بالمدرس يكتب على السبورة عبارة

" كان الرئيس إيها الشعب"

واذا به يصيح فى احد التلاميذ

_ هايييييييييييييييييي انت ... ايوا بقولك انت قوم اعرب لى الرئيس

فاذا بالتلميذ المسكين يذهب للسبورة ويكتب :

فاعل مرفوع بالضمة

وهنا يصرخ الاستاذ :

_ الريس بقى فاعل و مرفوع ... يخربيتك والبيوت اللى جنبك بيتك تعالوا يا عيال امسكوه لازم تركب الطيارة

والطيارة هى ان يقف التلميذ ووجهه متجها للدكة ويمسك كل تلميذ من اللى قاعدين فى الدكة ايد وحينها ياتى المدرس من خلفه ويرفع الخرازنة وهاتك يا صويت

ويتلفت الاستاذ ويبص لواحد تانى

_ قوم انت ... اعرب

فاذا بحظ هذا التعيس ان يكتب

الرئيس خبر مرفوع بالضمة

ولم يتمالك الاستاذ نفسه واذا به يقوم بضرب الطالب على قفاه

_ يعنى اللى قبلك خلاه فاعل و رفعه... وانت دلوقتى جايبلى خبره ... انا اللى هجيب خبرك ... اركب الطيارة

الا ان جاء دورى فاذا به ينظر الى ويقول

_ انت ياللى فى الاخر انت .. تعالى

فاذا بى انظر اليه بابتسامة صافية ساطعة

_هتعرف تعرب ولا تركب الطيارة

فاذا بى انظر اليه واقول

_ هعرف هعرف ... الرئيس... الرئيس ... الرئيس

_ انطق الرئيس ماله

_ الرئيس ... هو طيب ممكن يكون مفعول به

_ مفعول به ... دا انت هتروح وراء الشمس ... دا انت عمرك الحقيقى والافتراضى واللى مش حقيقى واللى مش افتراضى واللى بين البينين انتهى

_ انا ... انا .. انا بقول ممكن .. يعنى لسه مقولتش

_ اها... طيب اتنيل قول الرئيس ماله

_ الرئيس ... الرئيس .. الرئيس مضاف إليه لالالا الرئيس اسم علم .... لالالا الرئيس مبتدأ تانى ... الرئيس....خبر تانى... الرئيس من الاسماء الخمسة ...انا متلخبط يا استاذ

_ اسمع ياض انت ... قولى اجابة واحدة سواء غلط او صح .. وبعدها يا تركب الطيارة يا تتدخل والعيال تسقف لك

_ طيب انا هقول خبر بس مش مرفوع

وهنا يقرع احداً باب الفصل ويكون احد التلاميذ الجدد اللى أتوا متاخرين وكان باين عليه ابن ناس قوى وقال له الاستاذ عندما دخل

_ انت فاكرها الوكالة بتاعت ابوك .. انت لازم تركب الطيارة تعالى اعرب الرئيس

_ الرئيس لا محل له من الاعرب

_ سقفوا له جامد

واذا بالفصل يقوم بالتسقيف للطالب

وهنا يضع الاستاذ يده على كتف الطالب اللى العيال سقفوله

_ قولى بقى انت ركبت الطيارة قبل كدا

_ لا يا استاذ انا مش بركب طيارات انا بركب القطر

وهنا يمسك الاستاذ الطالب من قميصه ويقوله

_ اديك هتركبها امسكوه يا عيال

وبعد ان ركب المسكين الطيارة وطار فى دنيا العذاب بدا الاستاذ ينظر لى كما ينظر الذئب لضحيته

_ يلا بقى عشان تركب الطيارة

_ يا استاذ ما نسيب اعراب الرئيس عشان مش هنقدر عليه ... ونعرب الشعب

_ لالالا احنا عاوزين الرئيس ومش عاوزين الشعب وهتركب الطيارة

وبعد ان تم ركب من فى الفصل جميعاً الطيارة وتمتعوا برحلة منيلة بنيلة

قال الاستاذ اعراب الرئيس

الرئيس : اسم كان ويكون وسيكون

الخميس، 17 مارس، 2011

حقوق الإمرأة

حقوق المرأة .. حقوق المرأة .. حقوق المرأة... الكلمتين دول متتكلمش مع اى واحدة الاوتلاقيها بتقولهم ليك... بس هو يا ترى المرأة عاوزة حقوق ايه اكتر من كدا ..

ارى من منظورى الخاص ان الأمرأة" مش المرأة عشان المرأة حد غلبان"

خدت اكتر من حقها .. وجت كمان على حق الرجل ولسه برضوا عاوزين حقوق الأمرأة

الأمرأة

دخلت كل الميداين ميدان القضاء والمحاماة والطب والاسنان وكمان ميدان العتبة وشبرا والسبتية والحدية وكل الميادين الجمهورية .. وبتقول لسه مخدتش حقها !!!

قالوا الكترة تغلب الشجاعة ...و افتكر لما كنا فى الفصل كنا 3 صفوف صفين بنات وصف واحد صبيان يعنى نسبة البنات قد الولاد بالضعف بس مش عارف ليه مخلوش 3 صفوف بنات وكانوا قعدوا الولاد ع الارض

ودلوقتى لما يجى واحد رجل وواحدة إمراة يتقدموا لوظيفة.... غالبا بياخدوا الامراة...بس فى الحقيقة مش بياخدوا الرجل مع ان الراجل بيبقى فى احتياج للوظيفة اكتر وتيجى تسال ليه ؟ ... اسالوا المعلن عن الوظيفة

وفى المترو تلاقى فى عربيات للسيدات فقط.. ولما راجل يجى يدخل عربية السيدات تلاقى الستات تبصله من تحت لفوق وممكن يدفع غرامه مع ان انت لو جيت بصيت لباقى العربيات " اللى هى مفروض للرجال " هتلاقى كلها ستات ...لا وايه كمان عربيات الستات بتلاقيها رايقة وفاضية بس يمكن المراة بدور على حقها فى عربية مش بتاعتها

وممكن تبقى انت قاعد وهى تقولك قوم عشان هى تقعد مكان ... ولسه برضوا مخدتش حقها

وهنا يفرض سؤال نفسه يعنى الأمرأة بتطالب بحقوقها طيب ليه مش بتطالب بواجباتها يعنى مثلا ليه ما

يطبقش عليها نظام التربية العسكرية فى الكليات ولما تخلص كلية تتقدم للخدمة العسكرية وتتدخل الجيش زيها زى اى راجل " زى جيش اسرائيل واسرائيل مش احسن منا "

ومتستناش فى البيت لحد ما يجلها العدل لالا خلاص لازم تبقى زى الراجل والراجل اللى يعجبها تروح لحد باب بيته وتطلبه من ايد امه وتقدم الشبكة والمهر وكل متتطلبات الجواز

ويمكن بعد كام سنة هتلاقى المجتمع كله بقى ستات حتى الرجالة هيتحولوا ويغيروا بطاقتهم وساعتها برضوا هتلاقى ستات تقولك حقوق الأمرأة حقوق الامرأة حقوق الامرأة




الجمعة، 4 مارس، 2011

نظرية قلة الادب !!!





طبقا لنظرية الممنوع مرغوب… وسيب اللى فى ايدك وبص للى مش فى ايدك .. ومليش دعوة انا عاوز من ده....... فانى اتقدم باقتراح بانشاء وزارة جديدة تحمل اسم " وزارة بلا تربية بلا تعليم
"
طبعا الكلام دا انا جبته من الرف الشمال اللى موجود فى الركن اليمين ودا كان فى النصف الكروى اللى فى دماغى
فى الوقت الحالى من الالفية اللى جايه علينا تلاقى اول ما تتدخل برجلك الشمال العالم بقت غريبة قوى ناس تقولك انا عاوز ولادى متربيين احسن تريبة.. واعلمهم احسن تعليم ( علامة تعجب ) مع انى فى الحقيقة مكنش فى لا تريبة ولا تعليم ..طيب ليه بنضحك على بعضنا… ما تيجى على طول واجيلك على عرض ونجيب حد يجيب لينا الارتفاع ونبقى كدا حددنا الحل هو ان احنا ندرس قلة الادب ونخلى طريق الفشل ممهد للجيل الصاعد لدور النهائى من الدنيا ديا ونخليه ياخد فرصته ممكن يجيب لينا كأس ويشيل عننا الفأس ونعمل كلنا جلابية بارتى عند شلابية جارتى.
يعنى مثلا اولياء الامور يقعدوا سنين عشان يعلموا اولادهم معنى التربية ( ناس غريبة ) وسنين كمان عشان يتعلموا فى المدرسة و الجامعة ( لا بجد ناس غريبة قوى بقى ) وطالما دا بقى فى ايديهم يبصوا بقى على اللى مش فى ايديهم ما هو البنى ادم فى الاصل طماع.. وطالما بقى معاهم الادب والعلم يبقى لازم تبقى عينهم بقى على قلة الادب والجهل
لو حاولنا بقى نقلب الكلام ونخلى قلة الادب وقلة التعليم وقله كل حاجة متاحة ... والادب والتعليم والتربية ...والحاجات الوحشة دى هى اللى مش متاحة يا ترى الناس هيبقى نفسها تكون متربية ومتعلمة ولا يا ترى هيكون نفسهم فى حاجة تالتة احنا منعرفش عنها حاجة.
بس يمكن ساعتها هنلاقى الاولاد قريبين من اهلهم ..مش هيخبوا عليهم حاجة هيخبوا ايه بقى... دا هيبقى البساط احمدى
ويمكن اولياء الامور يتعلموا قلة الادب عشان ولادهم ميتعلموش قلة الادب من حتة غريبة
مع ان الناس المحترمين اهلهم مكنوش بيعلموهم قلة الادب .. كانوا بيسيبوا ولادهم يتعلموا قلة الادب من بره ..( ينفع الكلام دا ينفع يعنى)
بس احنا لازم ... لازم بجد نحمى قلة التربية ونحمى قلة التعليم من الناس المحترمين ونعطى كل ذى حقا حقه ..

بس اكيد ساعتها هنكون بنعمل حاجة احنا عارفين ايه هى حتى لو كانت غلط ومش هنضحك على نفسنا بحاجات مش موجودة.
. ولما يبقى كلا من التربية والتعليم من الممنوعات حينها سنشعر بالرغبة لهما و حينها يصبح التربية والتعليم فى الطريق السليم

مدرسة الدول العربية !






دلوقتى احنا دخلنا فى القرن ال 22 عشرين وها هى الدورة 23 من جامعة الدول العربية ....التى تجتمع فى كل دورة على امل انا تحل بعض المشاكل وليس كل المشاكل ... ولكن للاسف الدورة بتروح والمشاكل بتفضل..... وتيجى الجامعة ايد وراء ورجل قدام ... ويظل الحال كما المحال
فهل ان يعقل ان الدول العربية المشتركة فى اللغة والدين والتاريخ والجعرافيا وباقى المواد الدراسية لا تستطيع الوقوف ضد دولة واحدة واسترجاع حق العرب المسلوب من حرب 48 وارفاع كرامة العرب من جديد ... دولة واحدة وسط أكتر من دولة ومع ذلك مش قادرين عليها ...
اللى قبلنا قالوا الكثرة تغلب الشجاعة... واحنا عندنا كثرة واسرائيل معندهاش شجاعة يعنى كل حاجة معنا ما عدا حقنا ... زى ما يكون مش حقنا او زى ما نكون احنا عاوزينهم هما اللى يخدوه عشان احنا نتحسر وكاننا بنقول لباقى الدول الدنيا تعالوا احتلونا تعالوا حمونا .
وعندما قامت الولايات المتحدة الامريكية بشن حربا على العراق ( اللى هى المفروض دولة عربية ) اتخذت قواعد عسكرية من دول عربية اخرى لضرب العراق وزى المثل ما بيقول انا واخويا على ابن عمى وانا وبن عمى على الغريب وانا وامريكا على اخويا وعلى بن عمى وعلى اى حد تانى غريب بس حاجة غريبة قوى بعد لما الحرب ما تخلص نجتمع تحت قبة الجامعة العربية.
ثم اتت حرب لبنان والجامعة العربية قالت ... احنا مش مع حسن نصر الله مع ان اسرائيل مكنتش بتضرب فى حسن نصر الله دى كانت بتضرب فى لبنان
وبعدا فلسطين والعراق ولبنان يتم الان اختيار الضحية الجديدة من جامعة الدول العربية وكل الاصابع تشير الى السوادن مع وجود بعض الترشيحات الاخرى مثل الصومال واليمين
إين كانت الجامعة العربية من كل تلك الكوارث التى تحدث فى العالم العربى وإين مكانة الدول العربية وهذا العالم
لم اعد اسمع سوى انقاعد دورة وانقضاء دورة ... دورة وراء دورة وتبقى الحياة بعدها فوضى
فانا انصح جميع الدول العربية بالغاء فكرة جامعة الدول العربية والاشتراك فى اى جامعة اخرى او انشاء جامعة خاصة " بس تكون التكاليف مش غالية " وان يتم استيراد متخصصين عالمين لتتدريس احدث المناهج وتعليم العرب ازاى يبقوا شاطرين وياخدوا عشرة من عشرة ونجمة او يقوموا بالانتساب الى احدى الجامعات الاجنبية يعنى يشوفوا اسرائيل كانت فى انهى جامعة او يشوف امريكا ويعملوا زيها وساعتها هيبقى عندنا دول من جامعات عالمية ...
والمشكلة مش فى الدول العربية .. المشكلة فى مجموع الثانوية كان المفروض الدول العربية تتدخل معهد سنتين وتخلص بقى بدل ما تتدخل الجامعة وتفضل فيها الوقت دا كله على الاقل كانوا هيبقوا عارفين اللحاف وعارفين رجليهم ... انما هما دلوقتى مش عارفين مين اللى خد اللحاف ومين اللى خد الرجلين
يمكن اللى خدهم عاوز يسال سؤال ...
هى الدول العربية ناوية تفضل فى الجامعة كتير ومش ناوية تتخرج بقى؟
ولو مش ناوية نخليها مدرسة احسن !